Søkjer etter medarbeidarar

 I løpet av våren skal Jorunn Onarheim pensjonera seg. I over 50 år har ho dreve butikken på Årbakka.

No er ein i full gong med å etablera Årbakka Bygdabutikk som eit aksjeselskap eigd av fastbuande og ferierande på strekninga Krokavikjo/Nymark til og med Vattedal.

– Aksjekapitalen er på ca 670 000 kr og me er no i etableringsfasen med å få registrert selskapet, og med å få tilsett butikkmedarbeidarar, opplyser Ingebjørg Lien til Tysnesingen.

Ho seier at målsetjinga er å klare å oppretthalde ein lokalbutikk i bygda inntil det eventuelt vert bygd eit nytt butikksenter på Onarheim.

– Dette er viktig for både fastbuande og ferierande å behalda lokalbutikken og det har vore god oppslutnad om prosjektet, seier Lien. 

Audun Aarbakke er styreformann i det nyetablerte selskapet medan Lars Mæland, Jannike Alvær Lie, Sigfrid Olsen og Ingebjørg Lien er styremedlemmer.