Padleferie til Solstråleøyo

Fem venninner frå Voss fekk denne veka ei flott oppleving i kajakk i nydelig klarvêr på fjorden.

Onsdag la dei ut frå Våge og sette kursen mot Godøysund og Solstråleøya i tre medbrakte og to leigde kajakkar frå Båtlaget Njord/Tysnes.

Basen for ferien var huset på Solstråleøyo som dei hadde fått leigd fram til fredag.

Me spurte reiseledar for turen, Myrna Dral, om korleis denne padleturen kom i stand? “Du ,me er ivrige padlarar, nokon har vore guide, resten er og friluftsmennesker. Det er sonen min som går på villmarkslinja heime på Voss som tipsa meg om Solstråleøyo. Han var der i skikkelig uvær i september. Då var ikkje resten av gjengen vanskelig å be.”

Denne veka har det ikkje akkurat vore uvêr her på Tysnes – korleis var turen?
“Kva kan me seia? Så vakkert! Heftige naturopplevingar med fugleliv, meditative stunder i ro og solnedgang, samtidig intenst møte med fullmåne medan me var i kajakk. Eit hus på Solstråleøyo som har sjarm, utstyr til å lage gourmetmat og ei brygge til morgonbad. Ein superduper padletur”, seier Myrna til Tysnesingen.

Ingen tvil om at dette har vore ei flott oppleving. Bileta talar for seg. Kanskje det er fleire som lar seg frista av ein slik padleferie?