Parteringskurs med noko attåt

Tidspunktet for kurset var heilt ideelt, då hjortejakta byrja mandag, og muligheten for å praktisera burde vera stor.

Før kursdeltakarane fekk sleppa til med kniven, fortalde Solheim om kva faktorar som påvirka kvaliteten på kjøttet. Kvaliteten på det som kjem på middagsbordet er avhengig av blant anna kva dyr ein skyt, når i sesongen dyret blir skote, slakteprosedyrar og tempratur i modningsprossen.

Det vart òg gitt ei kort innføring i kva knivar som egnar seg og sliping av kniv.

Undervegs fekk deltakarane læra mange “triks” på korleis parteringa kunne gå lettare og kjappare.
Ein av deltakarane kom med følgjande kommentar, då dei fekk læra å beina ut ei hjorteribbe, “Dette åleine er jo verdt heile kurset !”

Utpå ettermiddagen var heile hjorten partert, stykkningsdelane pakka, merka og klar for frysen.
Her var det mykje inspirasjon til å bruka hjortekjøttet til anna enn hjortesteik og kjøttdeig.
Det blei gitt mange tips for korleis ein kan få stykkningsdelar som vanligvis blir malte til kjøttdeig, til å bli ein fortreffelig middag.

Kurset vart avslutta med at Johan Trygve Solheim serverte smaksprøvar av hjortekjøtt som hadde stått i vannbad i eit døgn.

Han serverte òg smaksprøvar av hjerte, tunge og testikklar. Alt såg ut til å falla i god smak hos deltakarane, til tross for at enkelte var noko skeptisk før dei våga seg til å smaka.

Då Johan Trygve takka for seg, svara trøtte, men inspirerte og fornøgde kursdeltakara med ståande applaus.

Tysnes Bonde- og Småbrukarlag vil få takka Johan Trygve for å ha delt kunnskapen sin med oss. Me vil òg få takka kursdeltakarane, for med dåkas gode humør og store engasjement vart dette ein svært trivelig dag.

Og sist men ikkje minst vil me få takka Jasper og Nynke på Myrdal Gård for at dei la tilrette for kurset der.

Tekst & foto: Jens Rasmus Tveit