Siste innspurt

Njardar/Tysnes oppfordrer spelarar og foreldre å komma til dugnad laurdag kl 10 ved den nye kunstgrasbanen.

Bjørn Kongsvik i banenemnda seier at dugnaden går ut på å skru saman mål og å setja opp gjerde rundt banen. – Eg håpar mange vil stilla på dugnaden. Då kan kanskje banen bli klar til bruk laurdag eller søndag, seier han til Tysnesingen.

Firmaet som legg banedekket har igjen arbeidet med å leggja sand og gummikuler oppå kunstgraset. Kongsvik fortel vidare at flomlysmastene er kome til Tysnes. – Eg håpar dei kan komma på plass i løpet av neste veke, seier han.

Kongsvik er mindre glad for at nokon har køyrt med scooter på grasbanen, og seier at forholda vil bli anmeldt om dette skjer igjen.