Kulturprisen til Sverre K. Dalland

Det var Tysnes sogelag som hadde foreslått kandidaten, fortel ordførar Helge Hauge.

I grunngjevinga heiter det at han gjennom mange år har vore aktiv i musikklag, songlag og Njord/Tysnes der han både var aktiv seglar og i nokre år formann.

Han har alltid vore oppteken av soga vår og slektsgransking. I ein mannsalder har han vore med i Tysnes sogelag der han også har vore formann. Mellom anna var han formann på den tida ein fekk i gong arbeidet med gards- og ættesogene.

Sverre var også med i redaksjonsnemnda i Bladet Tysnes i “Skår’en” si tid, og i 14 år var han Tysnes sin representant i styret i Sunnhordland museum- og sogelag.

Kulturprisvinnaren er kjent for si gode munnlege framstilling der han ofte krydra historia med historier. Han har også vore aktiv skribent, i sogelagsskriftet for 2008 har han ein ny artikkel.

Sverre har mange turar som guide bak seg, og i vår brukte Tysnes kommune han til å læra opp nye guidar som står klare til å overta stafettpinnen.

– Det var på tide Sverre fekk kulturprisen. Han er ein verdig vinnar av prisen, slår ordføraren fast.