Salma laks, østers og ordførarar frå Sunnhordland til Lyon

Det er 25.januar det skjer. Det vil bli servert ein norsk frukost, det vil sei ein ”utvida” frukost med blant anna Salma og østers frå Bømlo, laga og servert av kjende norske kokkar. Dette er blant anna tidlegare vinnar av Bocuse d`or , Geir Skeie frå Fitjar, Eivind Hellstrøm og Ingrid Espelid Hovig.

Landbruk og matminister Lars Peder Brekk deltek også på arrangementet. Samarbeidsrådet er representert med styreleiar Inge Reidar Kallevåg, Bømlo kommune og ordførar Helge Hauge, Tysnes kommune.  Underhaldning skal bømlingen Heine Totland ta seg av. 

Målsetjinga med frukosten er å generera positiv mediedekning gjennom å profilera Salma laks og østers frå Bømlo saman med ein del andre norske produkt. I tillegg skal arrangementet  bygga kjennskap til Norge og Sunnhordlandsregionen spesielt.  

Målgruppa er internasjonale kokkar, kundar av norsk sjømat, journalistar og andre som kan vera med på å fremja produkta. Det er invitert rundt 80 gjester til frukosten.  

Utanom frukosten skal Salma ha stand på messa i tilknytning til konkurransen Bocuse d`or. Her vil det og vera informasjonsmateriell og bilete frå Sunnhordland på storskjerm.   

Det er lagt opp til eit omfattande program for ordførarane. Blant anna skal dei til Galleries Lafayette Bron, ein finare dagligvare butikk saman med  Ingrid Espelid Hovig for å følgja ein demonstrasjon av Salmalaks.  

For Sunnhordland er dette ein fin måte å nå nye marknader på, både for østers og laks, men og for å profilera regionen som reisemål. Kundane er oppteken av kor produkta kjem frå, og det er difor ein god kobling å knytta dette til reiselivssatsinga i Sunnhordland.

Det er stor interesse for vandring og sykkel i Frankrike, og dette vert ein fin måte å synleggjera moglegheitene for desse aktivitetane i regionen.

Det er Samarbeidsrådet for Sunnhordland som melder dette.