Publisert av:
19/1/2016 10:07
Sundagsakademiet Tysnes folkebibliotek
Sundagsakademiet går i år inn i sitt tiande år. Denne sesongen vert det tre arrangement.
Det første foredraget vert førstkomande sundag, då journalist og forfattar Wenche M. Eriksen kjem til Tysnes.
Tid og stad: 24. januar kl 17, biblioteket i Tysneshallen. Gratis adgang.
Møtet med døden eller andre livskriser kan endra livet vårt fullstendig. Og ikkje berre på ein negativ måte. Det kan opna dører inn til vår skjulte indre kraft- eller visdomskjelde – og resultatet kan paradoksalt nok bli at du set meir pris på livet, på deg sjølv og dine medmenneske enn du gjorde tidlegare.
Forfattar og journalist Wenche M. Eriksen gav i 2003 ut boka ”Då hjarta brast”, som ho skreiv etter at ho mista sonen sin.
– Eg trur at mennesket rommar mykje meir enn det me til vanleg tenkjer over, seier Wenche M. Eriksen. – Gjennom tankar, ord og gjerningar er me alle medskaparar på denne planeten.
Me har alle eit personleg ansvar for korleis me lever, kva me vel å fokusera på – og ikkje minst korleis me oppfører oss mot våre medmenneske. Livet er som eit ekko: Me får tilbake det me sender ut.
Etter foredraget vert det opna for spørsmål og kommentarar, dersom nokre av tilhøyrarane har noko på hjartet. Som vanleg vert det ein kaffipause undervegs.
