Klem i veg

På Facebook har det den siste månaden vore mange som har meldt seg på gruppa “Klem ein Tysnesing-dagen”. Og denne litt, nyoppretta sådan, dagen er laurdag 19.desember. Fram til no har over 300 personar registrert seg og er klare til å klemma! Men veit alle opphavet til denne dagen?

Denne Facebook-gruppa begynte som ein spøk mellom Tysnes-jenta Stina Maria Hope og hennar gode venninne Kristin Borgen frå Os. Stina fortel dette om bakgrunnen for “Klem ein Tysnesing-dagen”:

“Eg hadde lagt merke til at det poppa opp så mange eventer på facebook med navn som “Klem en trønder-dagen”, “Klem en nesodding-dagen” “Klem en sørlendig-dagen” og liknande. Derfor oppdaterte eg statusen min på facebook der eg skreiv: “”Klem en trønder-dagen”, “Klem en nesodding-dagen”... Kor blir det av “Klem ein tysnesing-dagen?;)”
 
Nokre timar etterpå hadde Kristin laga ein event som heitte nettopp dette, og med beskrivelsen “For å oppfylle Stina sin største drøm”, ettersom eg hadde uttrykt ønske om ein slik dag i statusen min. Ho sette datoen til 19. desember for då skal me venninner som gjekk på Os gymnas ilag ha julebord saman, der eg blir den einaste tysnesingen. I utgangspunktet hadde ho berre invitert eit par felles venninner av oss til eventen, men sidan alle kan invitere andre til å delta på dette, spredde det seg raskt. Sist eg sjekka var det over 307 deltakarar!
 
Hadde aldri trudd at dette skulle få så stor oppmerksomhet, men det er jo berre å smile av det og tenke at det er ein positiv ting. Det er jo tross alt altfor lite klemming rundt om i samfunnet ;)”