Sunnhordlands- treff

Publisert av:
24/6/2015 11:44

Torsdag 25. juni er det duka for nytt Sunnhordlandstreff i regi av Samarbeidsrådet for Sunnhordland.

Heile 27 bedrifter, kommunar og festivalar står klare til å ynskje deltakarane velkomne.

Det er venta mellom 70 og 80 deltakarar til treffet. Her får dei høve til å knyte kontaktar med framtidige arbeidsgjevarar. I tillegg presenterer festivalane Fabrikken, Festidalen og Tysnesfest seg. 

Konferansier på arrangementet er styreleiar i Samarbeidsrådet for Sunnhordland og ordførar i Tysnes kommune, Kjetil Hestad. 

I tillegg til å knyte kontaktar, blir det mellom anna underhaldning, servering og filmframsyning. 

Denne gongen er det rekordmange stands på treffet.

Hit kjem ABB, Advantec, Akvator, Alsaker Fjordbruk, Apply Leirvik, Austevoll kommune, Bremnes Seashore, Bømlo kommune, Fabrikken, Festidalen, Fitjar kommune, Harding, HSH, iDrift, Kvinnherad kommune, Kvinnherad næringsservice, Kværner, SKL, SR-bank, Stord kommune, Tysnes kommune, Tysnes sparebank, Tysnesfest, Tysnespakken, Wärtsilä, Zenit Engineering og Samarbeidsrådet for Sunnhordland.

 

Treffet finn stad på Arena, Leirvik kl. 18 – 20.

Sunnhordlandstreff er eitt av verkemidla i omdømmeprosjektet for Sunnhordland, der hovudmåla er å medverke til at kvalitetane som finst i regionen vert betre kjende. I tillegg vil ein gjera det lettare for enkeltverksemder å rekruttera arbeidskraft.

Saman med næringsliv og andre offentlege aktørar har samarbeidsrådet sidan 2012 eit eige omdømme- og rekrutteringsprosjekt gåande. Dette arbeidet har som mål å auka kjennskapen til regionen.

 

Ambassadørtreff med omdømmefokus

Før sjølve sunnhordlandstreffet samlast bedrifter, kommunar og festivalar til ambassadørtreff.

Høgskulelektor ved BI, Morten William Knudsen kjem for å snakke om viktigheten av omdømmebygging, både i opp- og nedgangstider. 

Knudsen har god kunnskap om emnet og er ein populær føredragshaldar.